孫漢霖跟女團idG Bubbles現身上水廣場 與林日曦玩高球遊戲
.
《聲夢傳奇》歌手孫漢霖（火雞）、新出道7人女團idG Bubbles聯同高爾夫球新秀林日曦及運動大使唐焯彬今日（26日）出席上水廣場舉行的「全運同樂日」，他們大玩高球遊戲，火雞與idG Bubbles又即場獻唱歌曲，炒熱全場氣氛。
idG Bubbles表示很有興趣試打高爾夫球，感覺很優雅，又可訓練耐性，而且打波場地給人心曠神怡的感覺，其中成員Anesa曾於小學時玩過高爾夫球：「我爸爸鍾意玩，我覺得好新奇，所以叫爸爸帶我玩，仲買咗枝小童嘅高爾夫球杆畀我，但只係玩過一兩次。（覺得有冇天分？）冇，如果有嘅話，我應該會覺得好有滿足感，會繼續玩落去。（即場向林日曦請教？）好呀，有機會梗係要向佢偷師。」談到工作方面，繼上月推出首支團歌《泡泡我！》後，她們透露11月會再推出新歌：「第二首歌係講勇敢追夢追愛，都係跳唱風格，我哋大家都好鍾意呢首歌，希望大家多多支持。」今年她們將首次角逐音樂頒獎禮，她們直言大感期待：「我哋期待咗好耐，由準備出道前已夢想踏足頒獎台，希望可以展示我哋嘅成果畀大家睇。（對獎項有冇期望？）有就當然好，我哋無論有冇獎都會盡力。（9月先出道去爭獎會比較蝕底？）都唔會，我哋前大半年都係備戰狀態，想以最好狀態去出道，如果我哋早出道但狀態未夠，我哋都會不安。（準備咗戰衣未？）都係青春嘅校園風為主。」又謂期待在頒獎禮上見到樂壇前輩，笑言屆時一定會盡力集郵。
至於火雞最近嘗試玩摔角，他表示：「我由中學開始，有個好鍾意嘅摔角明星，之前見到有摔角手嘅訓練召募，由於摔角係表演性質運動，我本身比較內向，所以希望通過呢個運動令自己變得放開。」而他日前已完成人生首場賽事：「雖然成個過程係畀人打，但最後我係勝出，當日心情好緊張，但同時好興奮，每位摔角手都有人設同出場音樂，當音樂一響，我就冇咗緊張感。（你用咩名參賽？）我用火雞嘅英文名Fire Chicken，因為火雞講出嚟冇咁型，我嘅戰衣係黑色有紅色羽毛。（比賽時有冇受傷？）少少啦，腳腫咗少少。」同場有兩位高球好手，火雞坦言對高爾夫球有興趣，但從未接觸，若有機會的話也想向林日曦請教。
TVB[超话]
