【On.cc】佘詩曼與病母面貼面慶生 搣甩頭巾康復良好視后佘詩曼向來是圈中出名孝順女，疼錫母親，尋日（20日）佢晒出二人合照，原來為新劇《新聞女王2》宣傳忙爆嘅佢，專登同媽咪慶祝生日，二人仲面貼面合照，而佘媽媽亦終於唔使戴頭巾，以全新短髮示人：「我最愛嘅媽咪，生日快樂！尋日同你切蛋糕嘅時候，望住你笑到咪咪眼咁，冧晒！世上最奢侈嘅浪漫，唔係收到幾多花、幾多禮物。而係有人願意將畢生嘅春天花喺你身上，愛你、保護你！媽咪：感恩有你！P.S 希望大家都要記得，好好擁抱身邊愛你嘅人。趁仲嚟得切，用行動話佢知：你對我嚟講，好重要❤️」佘詩曼同媽媽慶生，今年Auntie以清爽短髮示人。佘詩曼見到媽媽笑到咪咪眼，佢自己都好冧。其實去年佘媽媽現身齋宴時，因用頭巾包頭及夏天時身穿厚衣服、頸圍布巾等，令網民懷疑佢身體出現問題。9月佘詩曼出席癌病活動時，佢僅表示病母性格樂觀，依家仍努力康復中。佘詩曼同媽咪感情深厚。大批圈中人都有留言祝賀。佘媽媽去年以頭巾包頭，身體響警號。
