葉蒨文曾展望搓波調情 財色兼收.藝人葉蒨文與曾展望的姊弟戀發展順利，日前更被發現拍拖到網球場，齊齊跟教練搓波，期間不乏親暱互動，搞到全場充斥粉紅泡泡！近日有不少廣告客戶邀請這對CP商演及出席活動，他們奉旨拍拖兼荷包腫脹，絕對「錢」途似錦。「帥哥女神配」曾展望（GM）與葉蒨文（Sophie）在無綫戀綜節目《女神配對計劃》配對成功後，迎來愛情與事業大豐收。他們至今交往約3個月，感情持續升溫，不但拍拖遊日，Sophie更效法羅子溢，在社交平台將另一半設為「唯一關注人」，公開在全網放閃。他們近日頻頻以情侶檔搵真銀，早前出席化妝品活動後，下月中又將亮相婚紗展，相信即將到來的聖誕、新年黃金檔會在工作中度過，而且身價已較之前幾級跳，名副其實「今時唔同往日」。日前傍晚時分，Sophie與GM暫時放低繁忙日程，被發現低調現身佐敦一個會所網球場「搓波仔」，雖然有「第三者」教練在場，兩人依然禁不住親暱互動，一部手機兩份睇、一支水兩份飲，明顯已進入「忘我境界」。GM望向女友眼神冧爆，頻用手輕拍Sophie頭頂，一臉溫柔溺愛，又主動拿起蚊怕水幫女友驅蚊，Sophie則掏出紙巾貼心幫男友抹汗，完全旁若無人。約一小時的網球課結束後，突然出現一班中年追星族，滿臉笑容的Sophie與GM見狀即趨前與眾人閒聊及分批合照，親和力十足。及後兩人收拾球場上四散的網球，整頓一切後才結伴離開，駕車往尖沙咀方向消失得無影無蹤。事後記者與Sophie取得聯絡，她大方回應：「係呀，咁啱嗰日有啲時間，佢媽咪同我媽咪分別北上，所以咪約佢囉，打完波去食晚飯。（佢導你打網球？）唔係喎！係我打先嘅，當年拍《隱形戰隊》要學嘛，後嚟就變咗我嘅興趣，一直都Keep住囉。（打波遇正粉絲群？）嗰班係教練啲屋企人，佢哋知道我哋嗰日上堂，就話要嚟見吓我哋。」對於盛傳目前吸金力驚人，Sophie承認經濟狀況確勝從前：「唔係扮嘢，有啲工作我真係唔知酬勞，只會同經理人講接咗先算，要把握每個機會嘛。（男友讀會計出身，將錢交畀佢幫你打理？）嘩！咁快？哈哈！依家我自己處理㗎，見有錢就投資啲比較穩陣嘅股票，反正仲未夠錢投資磚頭，況且香港啲樓咁貴，梗係要睇定啲先。」至於GM早前公開表示向結婚方向進發，Sophie甜笑說：「我都係第一次同細過自己嘅男仔發展感情，好彩感覺唔錯，比我想像中好。佢絕對係一位比實際年齡成熟嘅男仔，不過我諗暫時大家都要喺事業上先發力，其他嘢容後再談啦。」
